విజయం కొరకు...

కళ్ళల్లో కాంక్షల ఒత్తులు
అలాగే వెలుగుతూనే ఉన్నాయి
విజయం కొరకు నిర్మించిన మెట్లు
అలాగే ఒరుగుతూనే ఉన్నాయి
ఎన్ని సార్లు ఆత్మన్యూనతా పంక్చరు ట్యూబులోకి
ఆత్మవిశ్వాసపు గాలి పంపినా తుస్సుమంటూనే ఉంది
లక్ష్యం వైపు విసురుతున్న బాణాలన్ని
గురి తప్పుతూనే ఉన్నాయి
విజయం వైపు పరుగులు తీయాలన్న ప్రతిసారి
అపజయాల అవమానపు గుర్తులు చేతులు చాచి
వెనక్కి లాగుతూనే ఉన్నాయి
ఎన్ని తప్పటడుగులు పడుతున్నా ...
ఎన్ని ఎదురు దెబ్బలు తగులుతున్నా...
నడక నేర్వాలని తపించే పసివాడిలా
అస్తమించే సూర్యుడు ఉదయించట్లేదాని
విజయం కొరకు అర్రులు చాస్తూనే ఉన్నా!

-నాయుడు గారి జయన్న