వారణాసి నాగేశ్వరాచార్యులు జోగులాంబ గద్వాల జిల్లాకు చెందిన శతక కవి. ఇతను 1962 సంవత్సరంలో జన్మించాడు. జోగులాంబ గద్వాల జిల్లా మల్లకల్ మండలం మల్దకల్ వీరి స్వగ్రామం. తల్లిదండ్రులు సుభద్రమ్మ, వెంకట్రాములు. ప్రస్తుతం గద్వాలలో నివసిస్తున్నారు.
విద్యాభ్యాసం
బాల్యంలో మల్దకల్ లోని కోమటి జయన్న గారి దగ్గర ప్రాథమిక విద్యాభ్యాసం చేశారు. మల్దకల్ ప్రభుత్వ పాఠశాలలో ఏడవ తరగతి వరకు చదువుకున్నారు. అకాడమిక్ చదువు ఏడవ తరగతితోనే ఆగిపోయినా, సాహిత్యం పట్ల, పద్యరచన పట్ల మక్కువతో గద్వాలలోని జయతీర్థాచార్యలు, సీతారామశాస్త్రి, పార్థసారథిశాస్త్రి, వెల్దండ సత్యనారాయణ వంటి పండితుల దగ్గర ఛందస్సు పాఠాలు, పద్యరచన మెలుకువలు నేర్చుకున్నారు. వారి సలహా, సూచనలతో పద్యరచన చేశారు.
రచనలు
పలువురి పండితుల శిష్యరికంచే పలు పద్య మెలకువలు నేర్చుకున్న నాగేశ్వరాచార్యులు ఇప్పటి వరకు 6 శతకాలు రాసి ముద్రించారు.
1. శ్రీ మల్దకల్ తిమ్మప్ప శతకం (2015)
2. శ్రీమల్దకల్ రాయుని శతకం (2017)
3. శ్రీ జోగులాంబ దేవి శతకం (2019 )
4. శ్రీ మెల్దకంటయ్య శతకం (2022)
5. శ్రీ సోమనాద్రి శతకం (2023)
6. శ్రీ జములమ్మ శతకం (2024)
శ్రీ జోగులాంబాదేవి శతకం జూలై 2019 వ సంవత్సరంలో వెలువడింది. కందంలో రాయబడిన ఈ శతకంలో 111 పద్యాలు ఉన్నాయి. ఇందులో మకుటం - జోగులాంబాదేవి
శ్రీ గణనాథుని మ్రొక్కియు
వేగముగా శారదాంబ వినుతులతోనే
నీగతి శతకము చేయగా
సాగితిని జోగులాంబ సన్నుతి జేయన్ అను పద్యంతో ఈ శతకం ప్రారంభమవుతుంది.
ఇందులో ఒక పద్యం -
నీ దయ శుభంబు గూర్చును
నీ దయ నిత్యము నిల్ప నేర్పరితనమౌను
నీ దయ నాపై చూపవె
యాది పరాశక్తి జోగులాంబా దేవి అని కీర్తిస్తాడు
2022లో వెలువడిన మొల్దకంటయ్య శతకం తేటగీతిలో రాయబడినది. ఈ శతకంలో 113 పద్యాలు ఉన్నాయి. ఇందులో మకుటం -ఘనుడు శ్రీ మల్దకంటయ్య కరుణజూపు.
ఇందులో ఒక పద్యం-
సత్యభాషణంబులు నిల్పి సాగునపుడు
భయము లేదు భువిని వైభవంబుగల్గు
పుణ్యకార్యంబు చేయగా బూని నడువ
ఘనుడు శ్రీ మల్దకంటయ్య కరుణజూపు
సోమనాద్రి శతకం ఆటవెలదిలో రాయబడినది. ఈ శతకంలో 111 పద్యాలున్నాయి. భీమ కదనధీర సోమనాద్రి అనునది మకుటం.
ఇందులో ఒక పద్యం-
రాజరాజులెల్ల రారాజువని నిన్ను
వేగ పొగడి నారు వినుతి జేసి
గద్ద వ్రాలె కోట ఘనత గొప్పననంగ
భీమ కదనధీర సోమనాద్రి
శ్రీ జమ్ములమ్మ శతకం తేటగీతిలో వ్రాయబడిన శతకం. 111 పద్యాలతో కూడిన ఈ శతకంలో శరణు శరణమ్మ మాయమ్మ జమ్ములమ్మ అనునది మకుటం. ఈ శతకాన్ని తల్లిదండ్రులకు అంకితం ఇస్తూ కవి ఈ పద్యం చెప్పాడు.
జమ్ములమ్మ పేరున చేసి శతక మిద్ది
పితరులకు నంకితమునిచ్చి ప్రీతితోడ
గురువు మెప్పును బొందితి గొప్పగాను
శరణు శరణమ్మ మాయమ్మ జములమ్మ అంటూ రాసుకు వచ్చారు
ఈ శతకంలోప్రధానంగా జంతుబలిని నిరసించారు.
ఇవేకాక ఇతరుల సంపాదకత్వంలో వెలువడిన పలు సంకలనాలలో కూడా వీరి రచనలు ముద్రితమైనవి.
శ్రీ చంద్రమౌళీశ్వర స్వామి షష్టిపూర్తి సన్మాన సంచిక, శ్రీ భ్రమరాంబ మల్లికార్జున వైభవం కవితా సంకలనం, తెలంగాణ జల కవితోత్సవం, జడకందములు, అక్షరార్చన ద్వానాశాస్త్రి సప్తతి పూర్తి, జోగులాంబ గద్వాల జిల్లా సమగ్ర స్వరూపం, ద్వాదశ పుణ్యక్షేత్రాల విశిష్టత, పద్య ప్రభంజనం మొదలగు సంకలనాలలో వీరి రచనలు ప్రచురితమయ్యాయి.
మూలాలు
శ్రీ జోగులాంబ దేవి శతకం వారణాసి నాగేశ్వరాచార్యులు శ్రీరామ పబ్లిషర్స్ పాలమూరు, జూలై 2019
శ్రీ మంద కంటయ్య శతకం మల్దకంటయ్య శతకం వారణాసి నాగేశ్వరాచార్యులు శ్రీ రామ పబ్లిషర్స్ పాలమూరు జూన్ 2022
శ్రీ సోమనాద్రి శతకం వారణాసి నాగేశ్వరాచార్యులు శ్రీరామ పబ్లిషర్స్ పాలమూరు జనవరి 2023
శ్రీ జమ్ములమ్మ శతకం వారణాసి నాగేశ్వరాచార్యులు శ్రీరామ పబ్లిషర్స్ పాలమూరు మార్చి 2024
.jpg)
