కుక్కకు కన్ను ముఖ్యమే
చెవులు ముఖ్యమే
వీటన్నిటికన్నా
గతకడానికి నోరు మరీ ముఖ్యమే
కాదనలేని సత్యమే
కానీ...
వెనుకుందని తోక
అవసరం లేదా?
అన్నిటిలాగే అది కూడా భాగమే కదా!
కుక్క సంతోషానికి,
ఒదిగి ఉండే విధానానికి,
చూపే ప్రేమకు,
నిస్సహాయతకు,
తోకే కదా సంకేతం.
కుక్క నడకకు, పరుగుకు
తోకే కదా సంతులనం
అసలు కుక్కకు అందమే తోక
తోకంటివి
ఆడించకూడదంటివి
బస్సు చక్రాల కింద నలిపేస్తివి
ఒక చోట పెరికి,
మరో చోట అతికిస్తివి
కదపకుండా దశాబ్దం కట్టేస్తివి
నీ పతనకారకుల్లో
తోకకూ భాగమిస్తివి.
తోక కడ వాలమే కాదు
కరవాలం కూడా.
-ఎన్. జయన్న
కామెంట్‌లు లేవు:
కామెంట్‌ను పోస్ట్ చేయండి